Ekipa ,,Dana” uručila je paket Banke hrane Radulu Jelušiću, iz Kosića, nadomak Danilovgrada, koji živi težak život i bori se sa nemaštinom kojoj, čini se, nema kraja.
- Zahvalan sam ,,Danu” i Banci hrane na paketu. Dobro će mi doći za jedno vrijeme, ali time se moji problemi ne rješavaju. U svakom slučaju ovo mi dosta znači – kazao je Jelušić.
Podsjećamo, ovaj četrdesetdevetogodišnjak živi u kući staroj 120 godina koju je naslijedio od pradjeda i koja nikako nije obnavljana.
- To je najstarija kuća u tom području i u izuzetno je lošem stanju. Nemam ni vode ni kupatila. Ne radim i nemam nikakvih primanja – povjerio nam se Radula Jelušića. Svaki novi dan za njega je novi izazov i nemilosrdna borba, jer ne zna kako će preživjeti. Do prije rata radio je u jednoj građevinskoj firmi koja je propala i živio relativno normalnim životom.
- Baš tada kada sam ostao bez posla, majka mi se razboljela. Imala je moždani udar i morao sam da se brinem o njoj, tako da od tada nijesam nigdje radio. Sada nemam nikakvo primanje, čak ni zdravstveno osiguranje. Istina, mnoge institucije kojima sam se obraćao uvijek su mi izlazile u susret i pomagale mi uručenjem jednokratne pomoći. Na tome sam im veoma zahvalan – kaže Jelušić.
Dodaje, da je izbrisan iz evidencije nezaposlenih jer nije bio diciplinovan, odnosno nije tražio posao.
- Svjestan sam da puno mlađi i sa fakultetskim obrazovanjem ne mogu doći do posla, a ne ja od pedeset godina. Ko će mene zaposliti? Ne znam kako ću platiti dugove za struju koji su se već nagomilali, nemam od čega – potišten je Jelušić.
Kuća u kojoj stanuje je oronula, fasada je oljuštena, a unutra je sve crno kao ugarak. Uslovi za život ravni su nuli.
- Zimi je hladno, a ljeti vruće u kući. Zimi se grijem na drva, ali ove godine ću se vrlo teško snaći i za to. Do sada i nekako, ali svake nove godine sve je teže – kazao je zabrinuto Jelušić.
On je zabrinut kako će prezimiti dugu zimu. Ipak, ostaje mu nada da će se nekako snaći i da će se, možda, situacija nekada popraviti.
A.Ć.
Apel za pomoć
Svi ljudi dobre volje, a koji su u mogućnosti da pomognu Radulu Jelušiću, mogu to učiniti uplatom novčanih sredstava na žiro-račun broj 510010996521301779 kod Crnogorske komercijalne banke na ime Radule Jelušić.